ഉദയന്റെ സുപ്രഭാതങ്ങൾ

           

ഉദയന്റെ സുപ്രഭാതങ്ങൾ 

     സ്ത്രീപുരുഷ സമത്വത്തിന്റെ ഇക്കാലത്തു ഭാര്യയെ ജോലികളിൽ സഹായിക്കാത്തവർ ആരാണുള്ളത്. നിത്യവും രാവിലെമുതൽ ഭാര്യയെ സഹായിക്കുന്ന ഒരാളെ എനിക്കറിയാം. അദ്ദേഹത്തെ അതിരാവിലെ 'ആറര ഏഴുമണി'യോടെ ഭാര്യ വിളിച്ചുണർത്തുന്നു...മനുഷ്യാ.., നേരം വെളുത്തു.. ഇനിയെങ്കിലും ഒന്ന് എഴുന്നേൽക്ക്...പിന്നെ താമസമില്ല..എഴുന്നേറ്റയുടൻ വാട്സാപ്പ്, ഫേസ്‌ബുക്ക് ഇത്യാദി ആപ്പുകളിലൊക്കെ ഒന്ന് തലവച്ചു നേരെ അടുക്കളയിലേക്ക്...'ബെസർപ്പിന്റെ' അസുഖമുള്ള ആളായതുകൊണ്ടു പറമ്പിൽ കൈക്കോട്ടെടുത്തു കൊത്തുന്ന ശീലമൊന്നും അങ്ങേർക്കില്ല. കയ്യിൽ രണ്ടു മൂന്ന് വാട്ടർ ബോട്ടിലുകൾ ഉണ്ടായിരിക്കും. അതിൽ വെള്ളം നിറക്കുക എന്ന ഭാരിച്ച ജോലിയാണ് ആദ്യത്തേത്. ചോറ് വക്കുക, കറി വയ്ക്കുക, മീൻ വറുക്കുക തുടങ്ങിയ ചെറിയ ചെറിയ ജോലികളൊക്കെ അവൾ നേരത്തെ ചെയ്തു വച്ചിട്ടുണ്ടാകും... ചക്കരേ, ഉപ്പേരിക്ക് പയറോ വല്ലതും അരിയാനുണ്ടോ? ചോദ്യം കേട്ടപാതി 'സ്നേഹത്തോടെ' അയാളെ ഒന്ന് നോക്കിയിട്ട് ഒരു പാത്രത്തിൽ പയറും കുറച്ചു സവാളയും മേശപ്പുറത്തെടുത്തു വച്ചു. പാത്രവും സവാളയും താഴെ വെക്കുമ്പോൾ ഇത്രയും വലിയ ശബ്ദമുണ്ടാകുമോ? അയാൾ ചിന്തിച്ചു. ആ അതെന്തെങ്കിലുമാകട്ടെ. ഉള്ളത് 'വേഗം' അരിയാൻ തുടങ്ങി. അല്പം കഴിഞ്ഞു അയാളുടെ കയ്യിൽ നിന്നും കത്തി പിടിച്ചുവാങ്ങി അവൾ പറഞ്ഞു, മനുഷ്യാ, ഇത് രാവിലേക്കുള്ളതാ, ഉച്ചക്ക് വെക്കാനുള്ളതല്ല. കൂടെക്കൂടെയുള്ള മനുഷ്യാ എന്ന ഓർമ്മപ്പെടുത്തലുണ്ടല്ലോ? അതാണ് സ്നേഹം. അയാളുടെ ജോലികൾ തീരുന്നില്ല...കുട്ടികളുടെ കറിപ്പാത്രങ്ങളിൽ സ്പൂണുകൊണ്ട് കറി നിറയ്ക്കണം, അവൾ ചോറ് നിറച്ചു തരുന്ന പാത്രത്തെ ഒരു ടവ്വല്കൊണ്ട് നാല് വശത്തുനിന്നും കെട്ടണം. ആ ഒന്നും പറയേണ്ട. അങ്ങനെ കുട്ടികൾ സ്‌കൂളിലേക്ക് പുറപ്പെട്ടാൽ പിന്നെ സമാധാനമായി. പിന്നെ കഴുകിയ തുണികൾ ഉണക്കാൻ അവൾ രണ്ടു ബക്കറ്റിലും നിറച്ചു ബുദ്ധിമുട്ടി കൊണ്ടുപോകുമ്പോൾ അയാൾ സഹായിക്കാറില്ല. ആഗ്രഹമില്ലാഞ്ഞിട്ടല്ല. അതൊരു കരുതലാണ്. അവളുടെ ശരീരവടിവും സൗന്ദര്യവും അതേപടി നിലനിൽക്കണമെന്നുള്ള ആഗ്രഹം നിമിത്തം വിഷമത്തോടെയാണെങ്കിലും നല്ലൊരു വ്യായാമമായിക്കോട്ടെ എന്ന് കരുതി മനഃപൂർവം ഒഴിവാക്കുന്നതാണ്. ഭാര്യമാരെ ഇനിയും ജോലികളിൽ സഹായിക്കാത്ത ഭർത്താക്കന്മാരുണ്ടെങ്കിൽ ഇദ്ദേഹത്തിന്റെ കഥ നിങ്ങൾക്കൊരു പ്രചോദനമാകട്ടെ.

NB: ഈ കഥയിലെ കഥാപാത്രവും ഞാനുമായി യാതൊരു ബന്ധവുമില്ല.😃😃